๐๐ก ๐ฃ๐๐ข๐ง๐ข๐ฆ | ๐๐ถ๐ป๐ป๐๐น๐ถ๐ด: ๐ง๐ฎ๐ฟ๐ถ๐ฝ๐ป๐ผ๐ป๐ด ๐๐ฎ๐ด๐ถ๐๐ถ ๐ฆ๐๐ฝ๐ผ๐ฟ๐๐ฎ ๐ธ๐ฒ๐ป ๐ฃ๐ฎ๐ป๐ฎ๐ด๐ธ๐ฎ๐๐ธ๐ฎ๐๐๐ฎ ๐ป๐ถ ๐ฅ๐ฒ๐๐บ๐ฎ๐ฟ๐ ๐. ๐๐ฎ๐น๐น๐ฒ๐๐๐ฒ๐ฟ๐ผ๐
Nadanunan manen ti isasangbay ti baro a tawen ti panangisuro ken panagadal ngem saan a pulos bumaro ti tulong ken suporta dagiti tattao iti kumonidad ti pagadalan. Mapaneknekan daytoy ti kalkalpas a Division Kick Off iti Brigada Eskwela 2025 ti Schools Division of Ilocos Norte (SDOIN) a naangay iti Pagadalan Elementaria ti Bagbago-Puttao iti Distrito ti Solsona idi maika-9 ti Hunio 2025. Ditoy a natipontipon dagiti nagannak dagiti agan-adal, opisial ken miembro dagiti alumni, opisial dagiti adda iti Local Government Unit (LGU) nga idadauloan ti Mayor, dagiti Federated President iti Parent-Teacher Association, Kapitan, opisial, tanod, BHW, ken 4Ps iti Barangay Bagbago ken Barangay Puttao, BFP ken dagiti empleyado iti opisina ti SDOIN nga idadauloan ti Schools Division Superintendent (SDS) a ni Atty. Donato D. Balderas, Jr..
Naragsak, narambak, ken narag-o ti tumunggal maysa gapu kadagiti naisagana a paset ti aktibidad. Daytoy ket saan laeng a panangisagana ti pagadalan para iti sumangbay a panagkaklase ngem no di ketdi panangipakita ken panangpaneknek a ti maysa a pagadalan ket makuna a pagadalan no amin a miembro iti komunidad iti aglawlawna ket makikinnammayet para iti panangtulong a pananggun-od dagiti arapaap iti tumunggal ubbing nga agbasa ditoy.
Narambak a panagrugi! Narugianan ti programa babaen iti Brigada Pakuloโmaysa a panagragragsak sakbay iti amin. Amin a nasapa, kaubingan, kabaketan ken kalakayan nga immay nakibrigada eskwela ket naikkan iti premio kas panangsubad ti kinatudyo ken kinagagetda. Katawa ken is-isem ti nakita kadagiti nakipagpaset ta iti simple a pay-ayam ken papremio a naipaay kadakwada, nakitada a saan laeng nga isudat naragsak a tumulong no di ketdi pati amin nga sponsor ken nagipaay kadagiti bag, makmakan ken dadduma pay a papremio.
Nasayaat a kasasaad ti tumunggal maysa. Daytoy ti baro nga aktibidad iti Brigada Eskwela. Tarigagay ti pagadalan, aglalo ti mangidadaulo a ni Prinsipal Reymart Jay G. Ballesteros a maipaayan dagiti ubbing, nagannak ken tattao iti komunidad ti naan-anay nga impormasion maipanggep ti lokasion ken situasion iti pagadalan, ken dagiti nasisita a nga aramiden no dumteng iti didigra.
Naragsak a panagbasa! Kas maiyannatup iti tema ti Brigada Eskwela ita a tawen, โSama-sama para sa Bayang Bumabasaโ, nainayon ti maysa nga espesial a panagistoria iti uneg ti siled-pagbasaan. Indauloan dagiti mannursuro iti pagadalan daytoy nga aktibidad kas pinangipateg ti panagayat iti panagbasa ken panangitultuloy ti inobasion iti pagadalan a napauloan, โProject KuwentoJuan sa Aklatanโ.
Naruay a suporta ken tulong. Aglaplapunosan ti mensahe ti panangsuporta ti nangngegan dagiti agad-adal, nagannak ken tattao iti komunidad manipud iti SDS ken Federated PTA President ti Ilocos Norte ken iti Mayor iti Ili ti Solsona. Dagitoy a mensahe ti mangpaneknek a saan pulos nga agmaymaysa ti pagadalan iti panangpatanur kadagiti nalalaing, nagagaget, ken determinado nga agad-adal.
Nalangto nga aglawlaw. Babaen iti aktibidad a MULA sa Puso, nakaimula dagiti nakibrigada iti seedling ti lumboy. Saan laeng a naisagana ti pagadalan para iti nalangto nga aglawlaw no di ketdi nasursuruan pay dagiti nagannak ken tattao iti komunidad nga agmula iti kayo tapnon ad-adunto pay ti agbalin a linong dagiti ubbing iti masakbayan.
Napintas ken nadalus a pagadalan. Manipud kadagiti nadumaduma nga isponsor, naipaayan ti pagadalan iti pagpinta iti lamlamisaan ken pagdalus kas kuma sagad ken walis. Pudno nga aktibidad โPaPINTAsen ti Pagadalanโ ket naisayangkat tapno maparaburan ti pagadalan iti naan-anay pay a ramit tapno mapagtalinaed ti kinapintas ken kinadalus iti aglawlaw daytoy.
Nasalun-at ken nasaranta! Nadumaduma a ramit pangsalun-at ti naibunong kadagiti ubbing tapno maisaganada iti ania man sakit, sagubanit wenno didigra. Babaen iti โPag-aSALUN-AT,โ addan ti pangrugianan dagiti ubbing ken nagannak a mangsalaknib kadakwada iti ania man nga oras a salun-at ket maperwisio.
Nasirib a masakbayan. Babaen iti โBOOKlat,โ nanayonan manen ti basaen a libro dagiti agad-adal. Dakkel a tulong daytoy tapno maaddaanda ti reperensia no agkurangda iti basaen ken maikkanda pay ti liwliwa nga agsungbat kadagiti aktibidad nga adda kadagitoy a libro. Pudno nga amin a tao iti komunidad ket katulongan tapno mapabasa amin nga agad-adal!
Nabsog a bubuksit! Kas panangipaay dagiti addaan, ti โBusog ka ba Tiyanโ ket naisayangkat tapno maparaboran dagiti ubbing iti nadumaduma a makan. Daytoy ket pudo a parabor gapu ta makatulong daytoy a mangkiltay ti malnutrision kadagiti agad-adal.
Nalpasen ti opisial a panangrugi iti Brigada Eskwela 2025 ngem iti tunggal puspuso dagiti stakeholder ket agtultuloy a panangdungdungngo, panangsupsuporta ken panangitagtag-ay kadagiti agad-adal, mannursuro ken mismo a pagadalan.#
#BrigadaEskwela2025
#SDOINgreat
#inherited
#toured
(Feed generated with FetchRSS)
